प्रबंध संपादक नंदकुमार शहाडे यांचा महत्त्वपूर्ण निर्णय; विदर्भभरातून शुभेच्छांचा वर्षाव
विदर्भ वार्ता । प्रतिनिधी
वणी : पुणे येथून प्रकाशित होणाऱ्या लोकप्रिय साप्ताहिक स्टिंग ऑपरेशन या वृत्तपत्राच्या विदर्भ ब्युरो चीफपदी भास्कर (राजू) धावंजेवार यांची नियुक्ती करण्यात आली असून, या नियुक्तीमुळे विदर्भातील पत्रकारिता क्षेत्रात आनंदाचे आणि उत्साहाचे वातावरण निर्माण झाले आहे. वृत्तपत्राचे प्रबंध संपादक नंदकुमार शहाडे यांनी हा महत्त्वपूर्ण निर्णय जाहीर केला.
पत्रकारिता क्षेत्रातील प्रदीर्घ अनुभव, सामाजिक प्रश्नांवरील संवेदनशील दृष्टी, निष्पक्ष वृत्तांकनाची ओळख आणि जनतेच्या प्रश्नांना न्याय मिळवून देण्यासाठी असलेली तळमळ यांची दखल घेत धावंजेवार यांच्यावर ही जबाबदारी सोपविण्यात आली आहे. त्यांच्या नियुक्तीची बातमी समोर येताच पत्रकार, सामाजिक कार्यकर्ते, विविध संघटनांचे पदाधिकारी, राजकीय क्षेत्रातील मान्यवर आणि मित्रपरिवाराकडून अभिनंदनाचा वर्षाव सुरू झाला आहे.
नव्या जबाबदारीचा स्वीकार केल्यानंतर राजू धावंजेवार लवकरच संपूर्ण विदर्भाचा व्यापक दौरा करणार असून, प्रत्येक जिल्ह्यात सक्षम व कर्तव्यदक्ष प्रतिनिधींची नियुक्ती करण्याचा त्यांचा मानस आहे. यामुळे साप्ताहिक स्टिंग ऑपरेशनचे वृत्तजाळे अधिक व्यापक आणि बळकट होणार असल्याचे बोलले जात आहे.
विदर्भातील ग्रामीण भागातील प्रश्न, शेतकरी, कामगार, युवक, महिला तसेच जनहिताशी निगडित विषयांना प्रभावीपणे न्याय देण्यासाठी ही नियुक्ती महत्त्वपूर्ण ठरणार असल्याचा विश्वास व्यक्त केला जात आहे. सत्य, पारदर्शकता आणि जनतेच्या हक्कांसाठी लढणाऱ्या पत्रकारितेला नवे बळ देणारी ही नियुक्ती मानली जात असून, राजू धावंजेवार यांच्या पुढील वाटचालीसाठी सर्व स्तरातून शुभेच्छांचा वर्षाव होत आहे.
