तरुणांना ऐतिहासिक वारसाची ओळख...
सेल्फ डिफेन्स, शस्त्रकला व व्यक्तिमत्व विकासावर भर; २० एप्रिलपासून २८ जूनपर्यंत नगर भवन येथे मोफत प्रशिक्षण.
विदर्भवार्ता । प्रतिनिधी
वणी - शहरातील युवक-युवतींमध्ये शौर्य, शिस्त आणि ऐतिहासिक परंपरेची जाणीव निर्माण व्हावी या उद्देशाने शिव आनंद बहुउद्देशीय संस्था, रॉयल फाउंडेशन व वणी नगर परिषद यांच्या संयुक्त विद्यमाने ‘शिवकालीन ज्ञान संवर्धन व आत्मसंरक्षण प्रशिक्षण शिबिर’ आयोजित करण्यात आले आहे. हे शिबिर २० एप्रिल ते २८ जून २०२६ या कालावधीत दररोज दुपारी ४ ते सायंकाळी ६ या वेळेत नगर भवन (कल्याण मंडप), आंबेडकर चौक, वणी येथे पार पडणार आहे.
या शिबिरामध्ये विद्यार्थ्यांना सेल्फ डिफेन्स (मार्शल आर्ट), व्यक्तिमत्व विकास, शिवचरित्र व शंभूराजे विचार कार्यशाळा यांसोबतच लाठी, काठी, तलवार, दांडपट्टा, भाला, दोरखंड व नॉन चोक यांसारख्या पारंपरिक शस्त्रांचे प्रशिक्षण दिले जाणार आहे. यामुळे तरुणांमध्ये आत्मविश्वास वाढून शारीरिक व मानसिक बळकटी मिळण्यास मदत होणार आहे.
या उपक्रमासाठी मुख्य प्रशिक्षक म्हणून कु. तेजस्विनी राजू गव्हाणे कार्यभार सांभाळणार आहेत. तसेच शिबिरासंदर्भात अधिक माहितीसाठी कु. तेजस्विनी गव्हाणे (९५१८७६४७५१) व राजू गव्हाणे (९७६४२५३२५३) यांच्याशी संपर्क साधण्याचे आवाहन करण्यात आले आहे.
शिव-आनंद काठी-काठी ग्रुप, वणी यांच्या पुढाकारातून आयोजित या उपक्रमामुळे वणीतील तरुणांमध्ये शौर्यपरंपरेची जपणूक होऊन, स्वसंरक्षणाची भावना अधिक दृढ होईल, असा विश्वास व्यक्त होत आहे.
