विदर्भ वार्ता । प्रतिनिधी
वणी:आजच्या युगात साहित्य, पत्रकारिता, चित्रपट आणि समाजकारण यांचा समन्वय साधून समाजाला विचारांची दिशा देणारे व्यक्तिमत्त्व म्हणून डॉ. विनोदकुमार आदे यांचे नाव आदराने घेतले जाते. आपल्या लेखणीच्या सामर्थ्यावर त्यांनी केवळ साहित्यविश्व समृद्ध केले नाही, तर सामाजिक परिवर्तनाच्या चळवळीलाही नवी ऊर्जा दिली आहे. लेखक, कवी, पत्रकार, लघुपट निर्माते आणि सामाजिक प्रबोधनकार अशा अनेक भूमिकांमध्ये त्यांनी उल्लेखनीय कार्य केले आहे.
डॉ. आदे यांच्या लेखनात ग्रामीण जीवनातील वास्तव, संघर्ष, माणुसकी, सामाजिक विषमता आणि परिवर्तनाची आस यांचे प्रभावी चित्रण दिसून येते. त्यांच्या प्रत्येक साहित्यकृतीत समाजातील सामान्य माणसाच्या भावना आणि प्रश्नांना शब्द मिळतात. त्यामुळे त्यांचे साहित्य वाचकांच्या मनाला भिडते आणि विचार करायला भाग पाडते.
त्यांच्या साहित्य, सामाजिक आणि सांस्कृतिक योगदानाची दखल घेत सन २०२६ मध्ये नागपूर येथे "समाजभूषण" पुरस्काराने त्यांचा गौरव करण्यात आला. तसेच यवतमाळ जिल्ह्यातील वणी येथे समाजबांधवांनी त्यांचा विशेष सत्कार करून त्यांच्या कार्याचा सन्मान केला. हा पुरस्कार त्यांच्या प्रदीर्घ समाजनिष्ठ कार्याची पावती मानला जातो.
डॉ. आदे यांच्या साहित्याची दखल केवळ महाराष्ट्रापुरती मर्यादित राहिली नाही. "फुललेली बाग" या स्मरणिकेत त्यांच्या साहित्याला स्थान मिळाले असून त्यांच्या लेखणीचा सुगंध सातासमुद्रापार पोहोचला आहे. त्यांच्या लेखनातील सामाजिक आशय आणि वास्तववादी मांडणीमुळे विविध स्तरांवर त्यांचे कौतुक होत आहे.
साहित्यासोबतच त्यांनी दृकश्राव्य माध्यमाचाही प्रभावी वापर केला. मतदान जनजागृती आणि रोजगार या विषयांवर त्यांनी तयार केलेले लघुचित्रपट मोठ्या प्रमाणात लोकप्रिय ठरले. या चित्रपटांनी नागरिकांमध्ये लोकशाही, स्वावलंबन आणि सामाजिक जबाबदारीबाबत प्रभावी जनजागृती केली. समाजहितासाठी कला कशी वापरावी, याचा आदर्श त्यांनी घालून दिला.
कवितेच्या क्षेत्रातही त्यांची लेखणी तितकीच समर्थ आहे. "टुकार" आणि "बाप" हे त्यांचे काव्यसंग्रह प्रकाशित झाले असून त्यांना साहित्यप्रेमींचा चांगला प्रतिसाद मिळाला आहे. याशिवाय "तळतळाट" आणि "पाऊस" हे काव्यसंग्रह प्रकाशनाच्या अंतिम टप्प्यात असून वाचकांना त्यांची उत्सुकता आहे.
सध्या ते "अजून माझा बाप काही केल्या मरत नाही" या कादंबरीच्या लेखनात व्यस्त आहेत. ग्रामीण जीवन, कौटुंबिक संघर्ष, नातेसंबंध आणि सामाजिक वास्तव यांचा वेध घेणारी ही कादंबरी मराठी साहित्यात वेगळा ठसा उमटवेल, अशी अपेक्षा आहे.
पत्रकारिता क्षेत्रातही डॉ. आदे यांनी सामाजिक प्रश्नांवर निर्भीड आणि अभ्यासपूर्ण लेखन केले आहे. सत्याला प्राधान्य, लोकहिताची भूमिका आणि समाजाप्रती असलेली बांधिलकी ही त्यांच्या लेखनाची वैशिष्ट्ये आहेत. अनेक नवोदित लेखक, कवी आणि कलाकारांना त्यांनी मार्गदर्शन करून प्रोत्साहन दिले आहे.
साहित्य, कला, पत्रकारिता आणि समाजप्रबोधन यांचा सुंदर संगम घडवणारे डॉ. विनोदकुमार आदे हे आजच्या पिढीसाठी प्रेरणास्थान आहेत. पुरस्कार, सन्मान आणि लोकप्रियतेपेक्षा समाजात सकारात्मक परिवर्तन घडवून आणणे हेच त्यांचे ध्येय आहे. त्यांच्या लेखणीचा प्रवास असा अखंड सुरू राहो आणि समाजमनाला नवी दिशा देत राहो, हीच अपेक्षा.
वाढदिवसाच्या हार्दिक शुभेच्छा....
