विदर्भ वार्ता|प्रतिनिधी
वणी : भारताचे माजी पंतप्रधान, ज्येष्ठ राजनेते व कुशल वक्ते भारतरत्न अटल बिहारी वाजपेयी यांची जयंती आज देशभरात आदरपूर्वक साजरी करण्यात आली. “राष्ट्र प्रथम” हा विचार केवळ मांडून न थांबता तो आपल्या संपूर्ण राजकीय व सार्वजनिक जीवनातून जगून दाखवणारे अटलजी भारतीय राजकारणातील एक प्रेरणास्थान होते.
अटल बिहारी वाजपेयी यांनी पंतप्रधानपदाच्या कार्यकाळात देशाच्या सर्वांगीण विकासासाठी दूरदृष्टीपूर्ण निर्णय घेतले. पोखरण अणुचाचणी, सुवर्णचतुर्भुज महामार्ग प्रकल्प, ग्रामसडक योजना, तसेच शेजारी राष्ट्रांशी शांततापूर्ण संबंध प्रस्थापित करण्यासाठी केलेले प्रयत्न आजही स्मरणात आहेत. विरोधकांनाही आपलेसे करणारी त्यांची संयमित, सभ्य व सुसंस्कृत राजकीय शैली सर्वांसाठी आदर्श ठरली.
कवीहृदय असलेले अटलजी आपल्या ओघवत्या भाषणशैलीने व राष्ट्रनिष्ठ विचारांनी कोट्यवधी भारतीयांच्या मनात अढळ स्थान निर्माण करून गेले. त्यांच्या जयंतीदिनी विविध ठिकाणी अभिवादन कार्यक्रम, पुष्पांजली अर्पण करून त्यांच्या कार्याला उजाळा देण्यात आला.
अटल बिहारी वाजपेयी यांचे विचार, राष्ट्रभक्ती व मूल्याधिष्ठित राजकारणाची परंपरा पुढील पिढ्यांसाठी सदैव प्रेरणादायी राहील.
*विदर्भ वार्ता|पत्र* *एस दर्पण न्यूज* *चॅनेल परिवारा कडून*
*विनम्र अभिवादन*
