अ.भा. श्री गुरुदेव सेवा मंडळ, श्रीक्षेत्र गुरुकुंज आश्रम मोझरी यांच्या मार्गदर्शनाखाली श्री सद्गुरु जगन्नाथ बाबा गुरुदेव सेवा मंडळ, विठ्ठलवाडी (मुख्य शाखा) व श्री गुरुदेव सेवा मंडळ चॅरिटेबल ट्रस्ट, विठ्ठलवाडी वणी यांच्या संयुक्त विद्यमाने या कार्यक्रमाचे आयोजन करण्यात आले आहे. पहाटे ५ वाजता घटस्थापना, सामुदायिक ध्यान, ग्रामगीता वाचन व चिंतनानंतर रामधून-ग्रंथदिंडीला प्रारंभ झाला. रामनामाच्या घोषात व ग्रामगीतेच्या संदेशांनी परिसर भारावून गेला.
ग्रंथदिंडीमध्ये ग्रामगीता, संतवाङ्मय व राष्ट्रसंतांच्या विचारांचे दर्शन घडत असताना ग्रामस्वच्छतेचा संदेशही देण्यात आला. नागरिकांनी उत्स्फूर्त सहभाग नोंदवला. यानंतर दुपारी उद्घाटन सोहळा, सायंकाळी कीर्तन, तसेच पुढील दोन दिवस ग्रामीण व राज्यस्तरीय खंजेरी भजन स्पर्धा, सामुदायिक प्रार्थना, संतस्मृती कार्यक्रम व बक्षीस वितरणाचे आयोजन आहे.
“नांदेल ग्राम, विश्व वैभवे” या ग्रामगीतेतील विचारांनुसार समाजात मूल्याधिष्ठित परिवर्तन घडविण्याचा संकल्प या सोहळ्यातून अधोरेखित करण्यात आला. तीन दिवस चालणाऱ्या या भव्य आध्यात्मिक व सांस्कृतिक उपक्रमाला भाविकांचा मोठा प्रतिसाद लाभत आहे.
