लग्नसमारंभात बॅण्डऐवजी डिजेची पसंती; पारंपरिक कलाकार संकटात
विदर्भवार्ता । प्रतिनिधी
वणी-बदलत्या जीवनशैलीचा आणि आधुनिकतेचा प्रभाव आता पारंपरिक व्यवसायांवर स्पष्टपणे दिसू लागला असून, लग्नसमारंभ व विविध उत्सवांमध्ये एकेकाळी मानाचा मानला जाणारा बॅण्ड वाजवण्याचा व्यवसाय आज अस्तित्वाच्या उंबरठ्यावर येऊन ठेपला आहे. डिजेच्या वाढत्या लोकप्रियतेमुळे बॅण्ड वाजवून आपली उपजीविका भागवणाऱ्या कुटुंबांवर उपासमारीची वेळ येण्याची परिस्थिती निर्माण झाली आहे.
पूर्वी कोणत्याही लग्नसोहळ्यात बॅण्डच्या तालावर नाचणं ही एक परंपरा होती. बॅण्ड पथकांमध्ये अनेक कलाकार, वादक आणि कामगार सहभागी होत असत. मात्र, सध्या डिजेच्या आकर्षक साऊंड सिस्टीम, लाईटिंग आणि आधुनिक गाण्यांच्या ट्रेंडमुळे लोकांचा कल मोठ्या प्रमाणात डिजेकडे वळला आहे. यामुळे पारंपरिक बॅण्ड व्यवसायाला मोठा फटका बसत आहे.
बॅण्ड व्यवसायाशी निगडित असलेल्या अनेक कुटुंबांचा उदरनिर्वाह याच व्यवसायावर अवलंबून होता. पण कामाच्या संधी कमी झाल्याने त्यांना आर्थिक संकटाला सामोरे जावे लागत आहे. काहींनी तर हा व्यवसाय सोडून इतर मजुरीच्या कामांकडे वळण्यास सुरुवात केली आहे.
याबाबत बॅण्ड व्यवसायिकांनी शासनाकडे मदतीची मागणी केली असून, पारंपरिक व्यवसाय टिकवण्यासाठी विशेष योजना राबवण्याची गरज व्यक्त केली आहे. तसेच सामाजिक स्तरावरही पारंपरिक कलेला प्रोत्साहन देण्याची आवश्यकता असल्याचे मत व्यक्त होत आहे.
डिजेच्या वाढत्या प्रभावामुळे बॅण्ड व्यवसाय केवळ व्यवसाय न राहता आता अस्तित्वाच्या लढाईत अडकला असून, या पारंपरिक कलेचे जतन करण्यासाठी ठोस उपाययोजना करण्याची गरज निर्माण झाली आहे.
