ऑक्टोबरमध्येच दुष्काळाच्या झळा! पाण्याचा प्रत्येक थेंब आता अनमोल; शहरवासीयांनी आजच सावध होण्याची गरज
विदर्भ वार्ता । प्रतिनिधी
वणी :पावसाळा संपताच ऑक्टोबर महिन्यातच शहरावर पाणीटंचाईच्या संकटाच्या झळा जाणवू लागल्या आहेत. दिवसेंदिवस घटणारे पाणीसाठे, कोरडे पडणारे जलस्रोत आणि वाढती पाण्याची मागणी पाहता आगामी काळ शहरवासीयांसाठी आव्हानात्मक ठरण्याची चिन्हे दिसत आहेत.
दुष्काळ म्हटला की केवळ शेतकरी आणि ग्रामीण भागाचा प्रश्न अशीच आपली धारणा असते. मात्र, पाण्याची टंचाई निर्माण झाली की सर्वप्रथम त्याचा परिणाम शहरातील सर्वसामान्य नागरिकांच्या दैनंदिन जीवनावर होतो. पिण्याचे पाणी, घरगुती वापर, व्यवसाय, लहान उद्योग अशा प्रत्येक क्षेत्रावर त्याचा थेट परिणाम होतो.
ऑक्टोबरमध्येच जर पाण्याचे संकट जाणवू लागले असेल, तर उन्हाळ्यात परिस्थिती किती गंभीर होऊ शकते, याचा अंदाज घेण्याची हीच वेळ आहे. प्रशासनाने संभाव्य पाणीटंचाईचे नियोजन करणे आवश्यक आहेच; मात्र नागरिकांची जबाबदारीही तितकीच महत्त्वाची आहे.
दुष्काळाला सामोरे जाण्यासाठी शहरवासीयांनी काय करावे?
पाण्याचा अनावश्यक वापर तातडीने टाळणे, नळ सुरू ठेवून काम न करणे, गळणारे नळ व पाइपलाइन त्वरित दुरुस्त करणे, वाहन व घर धुण्यासाठी पाण्याचा अपव्यय टाळणे, शक्य तिथे पाण्याचा पुनर्वापर करणे आणि ‘गरजेपुरतेच पाणी, भविष्यासाठी पाणी’ हा संकल्प प्रत्येक कुटुंबाने करणे गरजेचे आहे.
आज आपण वाचवलेला पाण्याचा एक थेंब उद्याच्या संकटाची तीव्रता कमी करू शकतो. दुष्काळावर केवळ प्रशासनाने उपाय करायचा नसतो; समाजानेही त्याला सामूहिकपणे सामोरे जायचे असते.
शहरवासीयांनो, पाणी मुबलक आहे असे समजून वापरू नका. कारण नळाला पाणी येते म्हणून पाणी अमर्यादित आहे, असा गैरसमज उद्याचा मोठा धोका ठरू शकतो.
आज पाणी वाचवा… उद्याचे जीवन वाचवा!
